हवाई दलाचं लढाऊ विमान आसाममधून बेपत्ता, शोध सुरू

वृत्तसंस्था /नवी दिल्ली- भारतीय हवाई दलाचं एएन-३२ हे लढाऊ विमान आसाममधून बेपत्ता झाल्याने खळबळ उडाली आहे. या विमानात ८ क्रू मेंबर आणि ५ प्रवाशांसह एकूण १३ जण होते. दुपारपासून बेपत्ता झालेल्या या लढाऊ विमानाचा कोणताही संपर्क होत नसल्याने हवाई दलाने त्याचा शोध सुरू केला आहे.

आसामच्या जोरहाट येथून अरुणाचल प्रदेशसाठी हे विमान निघालं होतं. दुपारी १२.२५ वाजता या विमानाने उड्डाण घेतलं होतं. या विमानाशी हवाई दल प्रशासनाचा दुपारी १ वाजता शेवटचा संपर्क झाला. त्यानंतर या विमानाचा संपर्क झाला नसल्याचं हवाई दलाकडून सांगण्यात आलं. सूत्रांनी दिलेल्या माहितीनुसार विमानातून ८ क्रू मेंबर आणि पाच प्रवासी असे एकूण १३ जण प्रवास करत होते. या विमानाचा शोध घेण्यासाठी सर्व यंत्रणांना कामाला लागल्या आहेत.

एएन ३२ या मूळ रशियन बनावटीच्या विमानाचा हा तीन वर्षातील तिसरा अपघात आहे. याआधी २०१६ मध्ये हेच विमान बंगालच्या उपसागरावर गायब झाले. मागील महिन्यातच या विमानाचा मुंबई विमानतळावर अपघात झाल्याने धावपट्टी बंद पडली होती.

 

LEAVE A REPLY